ДУШАНБЕ, 23.05.2017 /АМИТ «Ховар»/. Кайҳоннавардон — аъзои ҳайати Стансияи байналхалқии кайҳонӣ Пегги Уитсон ва Ҷек Фишер барои таъмири таҷҳизоти берунии маҷмааи мадорӣ имрӯз, 23 май ба фазои кайҳон мебароянд, — иттилоъ додааст агентии ТАСС бо такя ба хабари расмии Раёсати миллии ИМА оид ба аэронавтика ва таҳқиқоти фазои кайҳон – NASA.
Тибқи хабари расмии NASA астронавтҳо қисмҳои аз кор баромадаи компютери эҳтиётиро, ки барои назорат аз болои баъзе фаъолияти стансия пешбинӣ шудааст, иваз мекунанд. Компютери мазкур рӯзи шанбе бо сабабҳои то ҳоло номаълум аз кор мондааст.
Дар хабари расмӣ ҳамчунин таъкид шудааст, ки сохторҳои иловагӣ фаъолияти компютери аз кор баромадаро иваз мекунанд. Аз кор баромадани компютер ба ҳайати стансияи байналхалқӣ ягон хатар надорад, ҳамчунин реҷаи кори стансия низ тағйир наёфтааст. Таҷҳизоти барои иваз кардан зарурӣ аллакай омода шудаанд.
Кайҳоннавардон Уитсон ва Фишер 12 май низ барои анҷом додани баъзе корҳо ба фазои кайҳон баромада буданд. Раёсати миллии ИМА оид ба аэронавтика ва таҳқиқоти фазои кайҳон – NASA ин амалиётро бомуваффақият арзёбӣ карда буд. Ҳарчанд зимни он амалиёти баромадан ба фазои кайҳон скафандри Фишер мушкилӣ эҷод карда буд.
Кайҳоннавард Пегги Уитсони 57-сола имрӯз бори даҳум ба фазои кайҳон мебарояд, аммо барои Фишери 43-сола ин дуюмин баромад ба фазои кайҳон хоҳад буд.
Ҳоло дар Стансияи байналхалқии кайҳонӣ дар баробари кайҳоннавардони амрикоӣ, ҳамчунин кайҳоннавардони Россия Олег Новитский, Федор Юрчихин ва намояндаи Агентии кайҳонии Аврупо Том Песке низ қарор доранд.