Душанбе, 18.10.2016. /АМИТ «Ховар»/. Ба самти музофоти Хайнани Ҷумҳурии мардумии Чин тӯфони «Сарик» ҳаракат дорад. Тавре интизор меравад, эҳтимол шаҳрҳои Тсюнхай ва Саня субҳи рӯзи сешанбе ҳадафаи асосии он қарор гиранд ва бинобар ин, дар фурудгоҳи маҳаллии «Мэйлан» наздики 250 парвоз лағв гардидаанд. Дар ин бора агентии АИР «Новости» хабар медиҳад.
«Ҳамчунин ҳаракати қатораҳои баландсуръат дар музофот ва киштиҳо дар атрофи ҷазираи Хайнан ва инчунин дарсҳо дар мактабҳо қатъ гардидаанд», — меафзояд манбаъ.
Чанде пеш мақомоти Чин дар иртибот ба наздикшавии тӯфони «Сарик», ки метавонад пуриқтидортарин ва харобиовартарин дар даҳсолаи охир дар ҷазира гардад, дараҷаи «зард»-и огоҳии тӯфон ва «сурх»-и хатари мавҷҳоро эълон карданд.
Ба моҳигирон ва сохтмончиёни назди соҳил амр карда шуд, ки фавран ҷойҳои кории худро тарк карда, ба ҷойҳои бехафв раванд.
Ёдовар мешавем, моҳи сентябр гирдбоди «Меранти» ва тӯфони «Малакас» Чинро паси ҳам фаро гирифта буданд, ки бар асари онҳо одамон ба ҳалокат расиданд.
↧
Дар Чин бар асари наздикшавии тӯфони «Сарик» наздики 250 парвоз лағв гардид
↧
