Душанбе, 22.09.2016 / АМИТ «Ховар» /. Тибқи иттилои ТАСС, ҷомеаи ҷаҳонӣ соли 2015 бо сабаби хушунат ва низоъ дар маҷмӯъ тақрибан 13,6 триллион долларро аз даст додааст. Дар ин бора Котиби генералии СММ Пан Ги Мун рӯзи чоршанбе дар як нишасти дастгирии Хазинаи сохтори сулҳи Созмон изҳор намуд.
«Дигаршавии иқлим, буҳрони иқтисодӣ ва молиявӣ, афзудани нобаробарӣ ва расидани бекории ҷавонон ба сатҳи хатарнок боиси низоъ ва фишори сахт бар мардум мешаванд, — иброз дошт Пан Ги Мун. — Баъд аз танаффуси тӯлонӣ, шумораи низоъҳо афзуданд. Ҳарчанд ҷангҳои байнидавлатӣ камтар шудаанд, дар кишварҳо даргириҳои дохилӣ сурат мегиранд, ки аксаран ,ба онҳо неруҳои беруна ва ғайридавлатӣ ҷалб мешаванд».
Бино ба гуфтаи котиби Генералии СММ, «тибқи арзёбии коршиносон, дар соли 2015 хушунат ва низоъ дар ҷаҳон тақрибан 13,6 триллион доллар арзиш дошт. Ин барои ҳар як сокинони сайёра бештар аз 1,8 ҳазор доллар аст». Ӯ ҳамчунин таъкид кард, ки «танҳо дар давоми соли 2015 ҷомеаи байналмилалӣ, аз рӯи ҳисобҳои гуногун, 34 млрд долларро ба амалиёти сулҳовар ва кӯмаки башардӯстона ба гурезагон ва одамони гирифтори низоъ сарф намудааст».
Пан Ги Мун изҳор дошт, ки хароҷоти пеш аз муҳлат барои ниёзҳои инсонӣ метавонад ин воқеаҳои фоҷиаборро пешгирӣ намояд. Дар ин робита Дабири кулли СММ аз давлатҳо даъват намуд, ки ба Хазинаи сохтори сулҳи СММ бештар сармоягузорӣ намоянд, чун «он ба миллионҳо нафар дар саросари ҷаҳон кумак намуда, имкони татбиқи лоиҳаҳоеро, ки сармоягузориаш барои дигарон хеле хатарнок аст, пешниҳод менамояд».
↧
Пан Ги Мун: хушунат ва низоъ дар як сол барои ҷаҳон беш аз 13 триллион долларро ташкил дод
↧