ДУШАНБЕ, 25.05.2017 /АМИТ «Ховар»/. Муқовиматҳои мусаллаҳона ва ҷорӣ будани зулму зурӣ ба ҳаёти зиёда аз 24 миллион нафар кӯдакони Шарқи Наздик ва Африкаи Шимолӣ таҳдид доранд, — иттилоъ додааст агентии «Associated Press». Аз нисф зиёди ин шумораи кӯдакон дар кишварҳои Яман ва Ироқ умр ба сар мебаранд.
«Зулму ситам фаъолияти сохторҳои ҳифзи тандурустии кишварҳоеро, ки ба мухолифатҳои мусаллаҳона гирифтор шудаанд, барҳам зада, ба зинда мондани кӯдакон таҳдиду хатари бевосита доранд», — изҳор кардааст Герт Каппеларе, директори минтақавии ЮНИСЕФ оид ба кишварҳои Шарқи Наздик ва Африкаи Шимолӣ.
«Шумораи зиёди кӯдакон дар баробари қурбони тиру туфангу таркишҳо шудан, ҳамчунин аз гирифторӣ ба бемориҳое мефавтанд, ки он бемориҳоро ба осонӣ пешгирӣ ва табобат карда мешавад», — илова кардааст Герт Каппеларе
Мувофиқи иттилои ЮНИСЕФ, дар рӯйхати кишварҳое, ки дар он кӯдакон аз ҳама бештар ба хатар гирифторанд, Яман дар ҷойи аввал қарор дорад. Зиёда аз 9 миллиону 600 ҳазор кӯдакон дар ин кишвар ба кумаки тиббӣ эҳтиёҷ доранд. Ҷанги дусола кишвари Яманро ба остонаи гуруснагӣ овардааст, дар ин кишвар кӯдакон ба серӣ хӯрок намехӯранд.
Мавриди зикр аст ки 23 май Ташкилоти умумиҷаҳонии тандурустӣ изҳорот дод, ки дар давоми ҳамагӣ чанд рӯз шумораи беморони гирифтори вабо якбора 50 фоиз зиёд шуда, аз 27 ҳазору 277 нафар то ба 35 ҳазору 217 нафар расидааст.
Бар асари ҷанги шаҳрвандӣ дар Яман ҳамагӣ камтар аз 45 фоизи муассисаҳои тандурустӣ пурра фаъолият мекунанд.