ДУШАНБЕ, 24.05.2017 /АМИТ «Ховар»/. Роҳбари ҷумҳурии Чеченистони Федератсияи Россия Рамзан Қодиров пешниҳод кард, ки аз анъанаи гузаронидани шабнишиниҳо ба муносибати занги охир дар мактабҳо даст кашида шавад, — менависад агентии «РИА Новости». Рамзан Қодиров таъкид намудааст, ки минбаъд дар мактабҳо барои гузаронидани шабнишиниҳои занги охир маблағҳои пулӣ ҷамъ карда нашаванд.
Пешниҳоди худро Рамзан Қодиров зимни мулоқоти корӣ бо вазири маориф ва илми Чеченистон Исмоил Бойхонов изҳор кардааст.
«Ман таклиф кардам, ки минбаъд аз гузаронидани чунин маъракаҳо дар мактабҳо даст кашида шавад. Чунин маъракаҳоро падару модарон метавонанд мутобиқи хоҳиши худ баргузор кунанд. Барои ин дар ҷумҳурӣ қаҳвахонаҳо, тарабхонаҳо ва ҷойҳои баргузор намудани маросимҳо зиёд ҳастанд, ки хоҳишмандон метавонанд дар ҳамон ҷойҳо хатми мактабро таҷлил кунанд», — навиштааст Рамзан Қодиров дар саҳифаи Instagram.
Ӯ зикр кардааст, ки қарор оид ба баргузор кардани шабнишинии занги охир аз тарафи кумитаи падару модарон гирифта мешавад, вале дар худи мактабҳо ҷамъоварӣ намудани маблағҳои пулӣ барои гузаронидани шабнишинии занги охир манъ карда шудааст.