ДУШАНБЕ, 24.05.2017. /АМИТ «Ховар»/ Дастаи футболи «Ваҳдат»-и шаҳри Ваҳдат, ки дар даври панҷуми мусобиқаи лигаи аввали футболи Тоҷикистон дар майдони худ дастаи «Локомотив-Помир»-и Душанберо бо ҳисоби калони 5:0 шикаст дод, бо 13 хол дар садри ҷадвали мусобиқа қарор гирифт. Дар ин бозӣ ҳамаи голҳоро ҳамлагар Меҳроҷиддин Музаффаров ба ҳадаф расонд.
Дар бози дигар дастаи «Кӯктош»-и ноҳияи Рӯдакӣ, ки дар меҳмонӣ дастаи «Зарафшон»-и Панҷакентро бо ҳисоби 1:0 мағлуб кард, бо дувоздаҳ хол мақоми дуюмро соҳиб шуд.
Дастаҳои «Эсхата»-и Хуҷанд ва «Саройкамар»-и Панҷ бо даҳимтиёзӣ мутаносибан дар зинаҳои сеюму чорум ҷой гирифтанд. Дастаи футболи «Эсхата» бозиро дар меҳмонӣ бо дастаи «Сомон»-и Данғара би ҳисоби дуранг (2:2) анҷом дод. Зимнан ин мусовии панҷуми дастаи «Сомон» ба шумор меравад.
Дастаи футболи «Саройкамар» дар шаҳри Кӯлоб аз дастаи «Равшан» бо ҳисоби 0:3 шикаст хӯрд. Ин аввалин ғалабаи дастаи «Равшан» дар мусобиқаи имсолаи лигаи аввал маҳсуб мешавад.
Дар ду бозии дигари даври панҷум дастаи футболи «Ҳулбук»-и Восеъ дар майдони худ бар дастаи «Маҳаллаи 83»-и Душанбе бо ҳисоби 3:0 ва дастаи «Зарбдор»-и Исфара дар меҳмонӣ бар дастаи «Парвоз» бо ҳисоби 1:0 пирӯз шуданд.
Бояд зикр кард, ки дар мусобиқаи лигаи аввал бинобар бозиҳои ҳаштякфиналии Ҷоми Тоҷикистон танаффус эълон шудааст. Бозиҳои даври шашум 9-10 июн барпо мегарданд.
