ДУШАНБЕ, 24.04.2017 /АМИТ «Ховар»/. Дар Ҷумҳурии Қазоқистон маъракаи дастгирии пешниҳоди президент Назарбоев доир ба манъи мондани риш ва пӯшидани шимҳои кӯтоҳ, инчунин либоси сиёҳи пӯшида оғоз гардид.
Аввалин шуда ба пешниҳоди президент Назарбоев мақомоти давлатӣ ва вакилони парлумон чун анъана вокуниш карданд. Эҳтимол пешниҳоди президент рӯзҳои наздик ба лоиҳаи қонун, ки аз ҷониби ҳар ду палатаи парлумони Қазоқистон пас аз бозгашт аз рухсатии тобистона баррасӣ мегардад, ворид карда шавад. Ин фарзияро иҷрокунандаи раиси кумитаи дини парлумони Қазоқистон Бахитҷон Кулекеев низ тасдиқ кард. «Аён аст, ки ҳоло вобаста ба он чи ки президент ба Муфтии олӣ ва динӣ пешниҳод намуд, супоришҳои мушаххас меоянд. Мо ин масъаларо меомӯзем. Аввалан асоси қонунгузориамон ва таҷрибаи байналмилалиро меомӯзем», — иқтибос меорад гуфтаҳои Кулекеевро Tengrinews.kz.
Ҳамзамон иҷрокунандаи вазифаи раиси Кумитаи дини парлумони Қазоқистон аз гуфтани он ки маҳз дар маҷмӯъ чӣ манъ карда мешавад, душворӣ кашида, ба рӯзноманигорон доир ба зарурати манъи намоишкорона мондани «риши салафигӣ» ва пӯшидани шимҳои кӯтоҳ изҳори андеша кард. Ба гуфтаи ӯ, ин тасвир дар ҷамъият ташвишовар аст, чунки «арзишҳои анъанавии мондагор ва ҷаҳонбиниро» аз байн мебарад. Бахитҷон Кулекеев мутмаин аст, ки на танҳо Қазоқистон, балки тамоми ҷомеаи ҷаҳонӣ аз мушкилоти омехта кардани дин бо сиёсат, ки дар он хусусияти беруна аз ҳолати дохилии инсон боло гузошта мешавад, дар ташвиш аст. «Масалан, дар Аврупо пӯшидани фаранҷӣ ва ниқобро манъ мекунанд. Дар мо низ ин масъала ба миён меояд. Ҳамааш бояд ба манфиати аксарият ва аз рӯи анъана бошад», — гуфт Бакитҷон Кулекеев.
Ҳамчунин дар зарурати ҷорӣ намудани манъи пӯшидани либоси мусулмонӣ вакили парлумон (палатаи болои парлумони Қазоқистон) Берганим Айтимова шубҳа надорад. Бино ба ақидаи собиқ намояндаи Қазоқистон дар СММ, ин ба он алоқаманд аст, ки Қазоқистон давлати дунявӣ мебошад. «Дар кишвари мо дин аз давлат ҷудо аст, вале дар ҷаҳони араб ва Исроил дин аз давлат ҷудо нест. Албатта, он ҷо қонунҳои дигар амал мекунанд. Мо наметавонем, ки ким-кадом давлатро намунаи ибрат кунем ва онро пурра дар кишварамон ҷорӣ намоем. Мо бо қонунҳои дунявӣ зиндагӣ хоҳем кард», — иқтибос овардааст ин гуфтаҳои Айтимоваро нашрияи интернетии Informburo.kz.
Тааҷҷубовар аст, ки дертар аз ҳама ба пешниҳоди Назарбоев Раёсати дини мусулмонони Қазоқистон вокуниш кард. Танҳо охири рӯзи 20 апрел муфтиёти Қазоқистон иттилоъ паҳн кард, ки дар он ба мусулмонзанон пешниҳод мешавад, ки бо риояи талаботи шариат ва анъанаи мардуми қазоқ либос пӯшанд. «Маслиҳат дода мешавад, ки либосҳои ба чашм расанда ва сиёҳ пӯшида нашаванд. Пӯшидани фаранҷӣ ё либоси сиёҳ бар хилофи анъанаҳои мост. Ин ба анъанаҳои ниёгони мо мувофиқ нест», — чунин шарҳ доданд пешниҳоди Назарбоевро аз Раёсати дини мусулмонони Қазоқистон.
Ёдовар мешавем, ки конститутсияи Қазоқистон ба шаҳрвандон ҳуқуқи озодона пайравӣ кардани ҳама гуна динро кафолат медиҳад.
«Фергана.ру»