ДУШАНБЕ, 18.03.2017 /АМИТ «Ховар»/. Артиши Сурия фармондеҳи саҳроии гурӯҳи террористии «Давлати исломӣ» (мамнӯъ дар Тоҷикистон)-ро, ки дар нест кардани ёдгориҳои Палмира даст дошт, маҳв кард. Дар ин бора агентии «ТАСС» бо истинод ба хабаргузории эронии «Форс» хабар медиҳад.
Бино ба иттилои манбаъ, фармондеҳи саҳроии ДИ бо номи Абуҳомид ал-Суҳни зимни ҳамлаи артиши Сурия ба минтақаҳои биёбонии қисмати шарқии музофоти Ҳумс кушта шудааст. Соли 2015 ӯ шахсан амали террористонро дар нест кардани ёдгориҳои таърихии Палмираи (Тадмори) қадим роҳбарӣ менамуд.
Тибқи иттилои агентии «Форс», амалиёти ҳарбӣ дар минтақаи Палмира идома дорад. 16 март артиши Сурия ба самти Бадия аш-Шарқӣ пеш рафта, баландии Ҷабал ал-Мазорро зери назорат гирифтааст. Зимни муҳорибаҳо даҳҳо террористон маҳв ва маҷрӯҳ гардидаанд.
↧
Артиши Сурия фармондеҳи «Давлати исломӣ» -ро, ки дар нест кардани ёдгориҳои Палмира даст дошт, маҳв кард
↧