ДУШАНБЕ, 11.03.2017 /АМИТ «Ховар»/. Буҳрони гуманитарӣ дар чор кишвари Африқо-Яман, Нигерия, Сомали ва Судони Ҷанубӣ дар таърихи мавҷудияти СММ аз соли 1945 калонтарин маҳсуб мешавад. Дар ин бора 10 март муовини Дабири кулли СММ оид ба масъалаҳои гуманитарӣ Стивен О’Брайен дар ҷаласаи Шӯрои амнияти ин ташкилоти ҷаҳонӣ изҳор дошт.
«Мо дар марҳилаи бисёр сангини таърихӣ қарор дорем. Аз оғози сол, алакай мо ба буҳрони калони гуманитарӣ дучор шудем. Ҳоло беш аз 20 миллион нафарро дар чор кишвар гуруснагӣ таҳдид мекунад. Бидуни кӯшишҳои дастаҷамъона ва ҳамоҳангшудаи ҷаҳонӣ одамон ба осонӣ аз гуруснагӣ мемиранд, бисёри дигар аз бемориҳо азият кашида, ҳалок мегарданд», — гуфт О’Брайен.
Ӯ огоҳ намуд, ки агар ҷомеаи байналмилалӣ раванди мазкурро дар ҳудуди ин чор кишвар нодида гирад, он гоҳ ҷаҳонро мавҷи нави гурезагон таҳдид мекунад, ки «дар бисёр минтақаҳо боз ноамниҳои зиёде ба бор мерад». Ба гуфтаи ӯ, СММ нақшаи гузаронидани амалиёти гуманитариро дар Яман, Нигерия, Сомали ва Судони Ҷанубӣ дорад.
Тавре О’Брайен иттилоъ дод, татбиқи ин нақша давоми панҷ моҳи оянда 4,4 миллиард доллари ИМА-ро тақозо мекунад.
2 х бо акс
↧
Буҳрони гуманитарӣ дар чор кишвари Африқо дар таърихи мавҷудияти СММ калонтарин маҳсуб мешавад
↧