ДУШАНБЕ, 22.02.2017/АМИТ «Ховар»/. Дастаҳои мунтахаби бонувони Тоҷикистон бо Қирғизистон бозии дӯстонаи футбол анҷом медиҳанд.
Тавре сомонаи ФФТ хабар медиҳад, дастаҳои мунтахаби занонаи Тоҷикистон (асосӣ ва 19-сола) давраи омодагиро ба мусобиқаҳои Осиёӣ дар шаҳри Алмаатои Қазоқистон созмон медиҳанд ва якбора дар ин ҷо бо дастаҳои мунтахаби занонаи Қирғизистон бозии санҷишӣ мегузаронанд.
Бо даъвати клуби футболи собиқадорони «Женис»-и ба номи Шариф Умарови Қазоқистон дастаҳои мунтахаби асосӣ ва 19-солаи бонувони Тоҷикистон аз 27 феврал то 4 март давраи тайёриро ба мусобиқоти мавсими соли 2017 дар Алмаато баргузор мекунанд ва дар давоми ин тайёриҳо ду бозии санҷишӣ ва дӯстонаи худро бо дастаи мунтахаби Қирғизистон 28 феврал ва 2 март доир менамоянд.
Имрӯзҳо дастаҳои мунтахаби бонувони кишварамон саргарми машқҳо дар шаҳри Норак мебошанд.
Ёдрас мешавем, ки дастаи мунтахаби бонувони Тоҷикистон ба наздикӣ дар бозиҳои интихобии Ҷоми Осиё-2018, ки аз 3 то 12 апрел дар шаҳри Душанбе мегузаранд, иштирок мекунад. Футболбозони мо дар гурӯҳи «А» бо дастаҳои мунтахаби Ироқ (3-юми апрел), Баҳрайн (5-уми апрел), Филиппин (7-уми апрел),Урдун (10-уми апрел) ва Амороти Муттаҳидаи Араб (12-уми апрел) қувва меозмоянд. Ғолиби гурӯҳ ба бозиҳои ниҳоии Ҷоми Осиё-2018, ки дар Урдун гузаронида мешавад, роҳхат мегирад. Дар сурати аз ин гурӯҳ ба бозиҳои ниҳоӣ роҳхат гирифтани дастаи мунтахаби Урдун (мизбони финал) дастаи зинаи дуюмро ишғол карда, ба бозиҳои ниҳоӣ меравад.
↧
Бонувони Тоҷикистон ва Қирғизистон бозии дӯстонаи футбол анҷом медиҳанд
↧
