ДУШАНБЕ, 29.01.2017. /АМИТ «Ховар»/. 28 январи соли 2017 дар натиҷаи фаромадани 40 тарма ва боришоти шадиди барф роҳи мошингарди Душанбе-Хуҷанд дар қисмати аз 51 то 71 км баста шуда, беш аз 100 мошин дар муҳосира монданд.
Аз Кумитаи ҳолатҳои фавқулода ва мудофиаи гражданӣ ба АМИТ «Ховар» хабар доданд, ки барои ташкили корҳо ҷиҳати аз ҷойҳои хавфнок муваққатан ба ҷойҳои осуда кӯчонидани одамон бо роҳбарии муовини раиси Кумитаи ҳолатҳои фавқулода ва мудофиаи гражданӣ М. Салимзда гурӯҳи корӣ таъсис дода шуд. Дар натиҷаи корҳои анҷомшуда аз шаби 28 то 29 январ 500 нафар одамон, 30 адад мошинҳои боркаш ва 60 адад мошинҳои сабукрав ба ҷойҳои бехавф кӯчонида шуданд. Як нафар бедарак шудааст.
Инчунин, барои тоза намудани роҳи мошингард ва барқарор намудани оқибатҳои ҳолати рухдода хадамоти роҳи ширкати «Innovative Road Solutions» (IRS) аз ду тарафи роҳ 6 адад техника сафарбар намудааст.
Дар ҷойи тарма фаромада барои таъмини амнияти аҳолӣ аз ҳисоби кормандони БДА ва хадамоти роҳи IRS дидбонгоҳ гузошта шудааст.
Аз ҷониби мақомоти иҷроияи ҳокимияти маҳаллии ноҳияи Варзоб аҳолии зарардида бо хӯрока ва хизматрасонии тиббӣ таъмин карда шуданд.
Инчунин, 28 январ дар қисми 91 км роҳи мошингарди Ваҳдат-Рашт-Ҷиргатол, дар мавзеи Кабудҷари ҷамоати Ҳакими ноҳияи Нуробод тарма фаромад. Барои тоза намудани роҳ ду техника сафарбар шудааст. Қурбонӣ нест.
Вазъияти мутташанниҷ дар роҳи мошингарди Душанбе-Хоруғ-Мурғоб, ки аз сабаби тармафароӣ дар ҳудуди ноҳияҳои Рӯшон ва Шуғнони ВМКБ баста аст, боқӣ мемонад. Ситоди барқарорсозии ҳолати фавқулода таъсис дода шудааст, ки шабонарӯзӣ фаъолият дорад.
Дар робита ба ин, Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон аз аҳолии кишвар даъват мекунад, ки аз сафарҳои дурудароз ва рафтан ба мавзеъҳои тармафаро худдорӣ намоянд.
Қаблан Кумита иттилоъ дода буд, ки бо назардошти гармшавии ҳаво ва боришоти зиёд тайи чанд рӯзи охир эҳтимолияти фаромадани тарма дар ноҳияҳои ВМКБ, дар доманакӯҳҳои Ҳисор, инчунин дар шоҳроҳҳои Душанбе-Хоруғ, Душанбе-Хуҷанд, Душанбе-Ҷиргатол, Хоруғ-Мурғоб ва Хоруғ-Ишкошим боқӣ мемонад.