Душанбе, 29.11.2016 /АМИТ «Ховар»/. Муҳофизони соҳилии Италия рӯзи душанбе 1400 нафар муҳоҷирро дар баҳри Миёназамин наҷот доданд. Дар ин бора агентии «Франс Пресс» бо истинод ба гуфтаи намояндаи муҳофизони соҳилии Италия хабар медиҳад.
«Ин тамоман рӯзи душвор буд, вале бо шарофати кори ба итмомрасонидаи наҷотдиҳандагон ҳамаи муҳоҷирон наҷот дода шуданд», — гуфт намояндаи муҳофизони соҳилӣ.
Мақомоти Италия рӯзи душанбе иттилоъ доданд, ки теъдоди рекордии одамони тавассути баҳр имсол омада ба қайд гирифта шуд. Тибқи гузориши агентии «Франс Пресс», дар соли 2016 тавассути баҳри Миёназамин наздики 171 ҳазор муҳоҷир вориди ин кишвар шудаанд. Рекорди қаблӣ соли 2014 дар сатҳи 170 ҳазор нафар буд.
Аксарияти муҳоҷирон ба кишварҳои Африқо рост меоянд, ки сокинони онҳо кӯшиш мекунанд тавассути соҳилҳои Либия ба Аврупо ворид шаванд.
Ҳафтаи сипаригашта Созмони байналмилалии муҳоҷират иттилоъ дод, ки наздики 4,7 ҳазор муҳоҷирон ва гурезагон соли 2016 дар баҳри Миёназамин ҳангоми кӯшиши ба Аврупо ворид шудан ба ҳалокат расидаанд.
↧
Италия: беш аз ҳазор нафар муҳоҷир дар баҳри Миёназамин наҷот дода шуданд
↧