Душанбе, 15.11.2016 /АМИТ «Ховар»/. Президенти ИМА Барак Обама бар он назар аст, ки афзалияти асосии таъмини амнияти миллӣ мубориза бо гурӯҳи террористии ба ном «Давлати исломӣ» (ДИ, мамнӯъ дар Тоҷикистон) дар Сурия ва Ироқ мебошад. «Афзалияти рақами як барои амнияти миллии мо бояд мубориза бо ДИ ҳам дар Мосули Ироқ ва ниҳоят ҳам дар Раққаи Сурия бошад», — изҳор дошт Обама дар нахустин нишасти матбуотӣ пас аз интихоботи президентӣ.
Интихоботи президентӣ дар ИМА 8 ноябр баргузор гардид. Дар он номзади Ҳизби ҷумҳурихоҳон Доналд Трамп пирӯз шуд. Маъмурияти нави ИМА бо роҳбарии Трамп пас аз маросими савгандёдкунии ӯ 20 январи соли 2017 ба фаъолият шурӯъ мекунад.
ИМА дар якҷоягӣ бо шариконаш шурӯъ аз соли 2014 ба муқобили ДИ дар Сурия ва Ироқ амалиёт мебарад.
Дар навбати худ Трамп изҳор дошт, ки муттаҳид намудани талошҳои ИМА ва Русияро дар мубориза бо ин гурӯҳ дуруст меҳисобад. Амалиёти озоднамоии Мосули Ироқ аз 17 октябр инҷониб идома дорад. Дар он низомиёни Ироқ, полиси маҳаллӣ, неруҳои пешмаргаи курдӣ ва инчунин қувваҳои ҳарбӣ-ҳавоии эътилофи байналмилалӣ таҳти роҳбарии ИМА иштирок доранд.
Дар оғози моҳи ноябр амалиёти озоднамоии ба ном «пойтахти ДИ» — Раққа оғоз гардид. Ин шаҳр дар шимоли Сурия дар километри 160-уми шарқи Ҳалаб дар соҳили дарёи Фурот ҷойгир аст.
↧
Обама мубориза бо ДИ-ро «афзалияти рақами як» барои ИМА дар Сурия ва Ироқ номид
↧
