Душанбе, 07.02.2016. (АМИТ «Ховар»). — Дар ин бора дар изҳороти ниҳоии иштирокдорони мулоқоти сеюми чоргонаи гурӯҳи тамос (ИМА, Чин, Покистон ва Афғонистон) оид ба таҳияи «Харитаи роҳ»-и раванди сулҳи Афғонистон, ки дар пойтахти Покистон — шаҳри Исломобод анҷом ёфт, гуфта шудааст.
«Гурӯҳи тамос ба хулоса омад, ки натиҷаи музокироти Афғонистон бояд роҳи ҳалли сиёсии қатъи хушунат ва истиқрори сулҳи пойдор дар Афғонистон гардад», — омадааст дар изҳорот.
Ҳамчунин дар он зикр шудааст, ки: «Дар ин замина узви гурӯҳи тамос ба мувофиқа омаданд, ки кӯшишҳои муштаракро барои муайян кардани рӯзи аниқи музокироти мустақими ҳукумати Афғонистон ва намояндагони фраксияҳои гуногуни ҳаракати «Толибон», бо назардошти он, ки интизор меравад то охири моҳи феврали соли равон баргузор шаванд, идома медиҳанд».
«Мулоқоти навбатӣ рӯзи 23-юми феврал дар Кобул доир мешавад», — омадааст дар изҳорот.
Ёдовар мешавем, ки қаблан мулоқоти ҳайати баландпояи Покистон, Афғонистон, Чин ва ИМА оид ба таҳияи лоиҳаи «Харитаи роҳ»-и азсаргирии музокироти ҳукумати Афғонистон бо «Толибон» 11-уми январ дар Исломобод ва 18-уми январ дар Кобул баргузор шуда буд.