Душанбе, 04.02.2016 (АМИТ «Ховар»).-3- юми феврали соли равон зимни гузаронидани чорабиниҳои фаврӣ-ҷустуҷӯӣ аз ҷониби кормандони милитсия марди 31-солаи ноҳияи Мастчоҳ ҳамчун гумонбар дар тайёр кардан ва ба муомилот баровардани пул ё қоғазҳои қиматноки қалбакӣ дастгир шуд. Аз гумонбаршуда ба миқдори 80 ҳазор рубли русии қалбакӣ дарёфт ва мусодира гардид, ки онҳоро мехост дар бозорҳои шаҳри Хуҷанд ба муомилот барорад. Нисбат ба гумонбаршуда бо моддаи 281 қисми 1 Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, тафтиши ҳодиса идома дорад.
